Рухани жаңғыру

Опубликовано: 09 қаңтар 2018, 12:20

БҚО-да «Рухани жаңғыру» бағдарламасы бойынша 2,6 млрд. теңгенің жобалары жүзеге асқан

 

«Рухани жаңғыру» бағдарламасының 4 кіші бағдарламасы бойынша БҚО-да жүзеге асатын 44 кіші жоба мен 251 шараның тізімі жасалды. Өткен жылға белгіленген жоспарлар тиісті деңгейде орындалды. Жалпы сомасы 2,6 млрд. теңгенің жобалары жүзеге асты. Осы қаржының бір бөлігі бюджет есебінен бөлінсе, қалғаны меценаттар тарапынан қаралды. Бұл туралы аталмыш бағдарламаны іске асыру бойынша өткен облыстық сарапшылар кеңесінің отырысында облыс әкімінің орынбасары Ғабидолла Оспанқұлов мәлімдеді.

Бүгін «Нұр Отан» партиясының облыстық филиалы ғимаратында өткен бұл жиынға мемлекеттік құрылым, қоғамдық ұйым, ассамблея өкілдері мен кеңес мүшелері қатысты.

-Былтыр жыл соңында «Рухани жаңғыру» бойынша республикалық жобалық кеңсесінен өңірлердегі сарапшылық кеңесін мемлекеттік қызметші емес, тәуелсіз азаматтар басқару жөнінде тапсырма келді. Былтыр бұл сарапшылық кеңеске мен жетекшілік жасаған едім. Енді мына тапсырмаға сәйкес ҚР Президенті әкімшілігінің келісімімен, облыс әкімінің шешімімен бұл қызметке облыстық мәслихаттың депутаты Нұрлан Серғалиев тағайындалып отыр. Ал хатшы болып Жәңгір хан атындығы БҚАТУ музейінің директоры, тәуелсіз сарапшы Нұржан Төлепов бекітілді. Кеңес мүшелері негізінен бұрынғы құрамда қалды. Осы жаңа құраммен жаңа 2018 жылғы жұмысымызды бастаймыз.

Елбасы «Болашаққа бағдар: рухани жаңғыру» бағдарламалық мақаласын былтыр жариялады. Сол себепті өткен жыл бұл бағдарламаның қалыптасу жылы болды. Жобалық кеңсе жасақталды, сарапшылық кеңес құрылды, облысымызда, соның ішінде аудандарда бұл бағытта түрлі жұмыстар атқарылды. Елімізге танымал сарапшылар келіп «Рухани жаңғырудың» негізгі қағидаттарын жастарымызға түсіндірді. Алаш қозғалысының 100 жылдығына орай ғылыми-практикалық конференция, өзге де маңызды іс-шаралар өтті. Жыл соңында облыс әкімі кейбір меценаттарды марапаттағаны белгілі. Сондай-ақ аудандар әкімдері «Рухани жаңғыру» бағдарламасы аясында аудан-ауылда жүзеге асатын жобаларының тұсаукесерін жасады. Бұл жобаның бәрі біртұтас картаға енгізіліп, республикалық кеңсемен келісілді. Жалпы жыл қорытындысында осы атқарылған іс-шаралар бойынша біз ел көлемінде алғашқы бестікке ендік. Бұл жақсы көрсеткіш,-деді жиынды ашқан Ғабидолла Абдоллаұлы.

Жиынның күн тәртібіндегі мәселелер бойынша баяндама жасаған облыстық білім басқармасының басшысы Шолпан Қадырованың сөзіне қарағанда, «Туған жер» бағдарламасының «Тәрбие және білім» кіші бағдарламасы үш базалық бағытта іске асуда. Олар: рухани-құндылық және практикалық бағдар беру мақсатындағы «Өлкетану», баланың қабілет-қарымын, даму перспектикасы мен ертеңгі еңбек нарығындағы мүмкіндіктеріне орай «Саналы азамат» және жастардың бойында азаматтық, патриоттық, рухани-адамгершілік қасиеттерді қалыптастырып, дамытуға негізделген «Отаным – тағдырым» бағыттары. 2017-2022 жылдар аралығында өтетін 90 шара тізілімге енгізілді. Былтырдың өзінде 44 шара болып, оған 32 мыңнан астам адам тартылды. Ал биыл бұл тізілім бойынша 88 іс-шара ұйымдастырылып, 50 мың адам қамтылатын болады.

Азаматтық белсенділігі мен өз туған өлкесінің тағдыры үшін жауапкершілік сезімін нығайтуға бағытталған «Атамекен» кіші бағдарламасының өңірімізде жүзеге асуына жауапты болып белгіленген облыстық жастар саясаты басқармасы тарапынан да біраз жұмыс атқарылды. Аталмыш басқарма басшысы Аян Сақошевтің баяндауынша, өңіріміз бойынша 93 жоба тізілімге енгізіліп, оның 67-сі аяқталды.

Жиын барысында айтылғандай, сарапшылық кеңес мүшелері кіші жұмыс топтарға бөлінеді, олар тиісті бағыттар бойынша ұсынылатын жобаларды қарайды. Жалпы аталмыш бағдарлама бойынша жүзеге асатын барлық жоба сарапшылық кеңес мүшелерінің келісімен іске асады.

Опубликовано: 16 желтоксан 2017, 10:54

Оралда «Рухани жаңғыру» музейі ашылды

16 желтоқсан - Қазақ елінің тәуелсіздігі мерекесі күні Орал қаласында "Руxани жаңғыру" музейі ашылды.

Музей Елбасы Нұрсұлтан Назарбаевтың "Болашаққа бағдар: руxани жаңғыру" бағдарламалық мақаласы аясында БҚО әкімдігінің басшылығымен БҚО мәдениет, арxивтер және құжаттама басқармасы қолдауымен, БҚО тариxи-өлкетану музейінің ұйымдастыруымен ашылып отыр.

Ашылу салтанатына БҚО әкімі Алтай Көлгінов, Орал қаласының әкімі Мұрат Мұқаев, БҚО мәдениет, арxивтер және құжаттама басқармасы басшысы Қадырболат Мұсағалиев, өлкетанушы Жайсаң Ақбай, ақын Ақұштап Бақтыгереева, өлкеге танымал тұлғалар, студенттер, БАҚ өкілдері қатысты.

Облыс әкімі А.Көлгінов құттықтау сөзінде музейге бас демеуші болған "Kaz Construction Group” компаниясының бас директоры М.Мұxамедиевке алғыс айтты. Сөз алған мәдениет саласының ардагері Ж.Ақбай Президент Н.Назарбаевтың "Болашаққа бағдар: руxани жаңғыру" бағдарламалық мақаласы аясында республикада ашылып отырған алғашқы музей екенін атап өтті.

"Руxани жаңғыру" музейі "БҚО киелі жерлері", "Ұлттық баспасөз тариxы", "Батыс Алаш Орда тариxы" және "Жаңарған өлке" атты төрт экспозициялық залдан тұрады.

Опубликовано: 07 желтоксан 2017, 12:03

Зеленовта «Туған жер» бағдарламасымен 35 жоба іске аспақ

Келер жылы Зеленов ауданында Елбасының «Болашаққа бағдар: рухани жаңғыру» стратегиялық мақаласының «Туған жер» бағдарламасы аясында 35 жоба іске асырылмақ. Бұл туралы өңірлік коммуникациялар қызметі алаңында өткен бирфингте аудан әкімі Асхат Шахаров мәлімдеді.

- Елбасының «Болашаққа бағдар: Рухани жаңғыру» стратегиялық мақаласының «Туған жер» бағдарламасы аясында ауданда бірқатар шаралар ұйымдастырылуда. Атап айтсақ, тақырыптық ғылыми-конференциялар, зиялы қауыммен кездесу кештері, аудан оқушыларының еліміздің киелі орындарына саяхаты, аудан жастарының ел тарихын тану мақсатында экспедициялары ұйымдастырылды, - деді Асхат Берлешұлы.

Одан әрі аудан әкімі «Қазақстан-2050» Стратегиясының ұлт денсаулығын нығайту мақсатында бұқаралық спортты дамытуды міндеттейтіндігін айта келіп, ауылдық округтер мен аудан орталығында балалар ойын алаңдары мен спорт алаңдары салынатындығын жеткізді.

– Аудан орталығында жуырда ғана «street workout» және балалар ойын алаңы ашылса, жақын күндері спорт және сауықтыру кешені іске қосылмақ. Елбасының «Болашаққа бағдар: рухани жаңғыру» мақаласының «Туған жер» бағдарламасы аясында жергілікті азаматтардың қолдауымен «Ана мен бала» демалыс саябағы ашылды. Тәуелсіздік күні мерекесі қарсаңында аудан орталығында «Тәуелсіздік тұғыры» монументін ашуды жоспарлаудамыз. Бұл жұмыстар келер жылы да жалғасын табады.

«Болашаққа бағдар: рухани жаңғыру» мақаласы ел дамуының нақты қадамдарын көрсететін келелі ой, батыл шешімдерге құрылған маңызды құжат екендігін айтып, іскер жерлестерімізді бағдарлама бағыттарын іске асыру мақсатына жұмылуға шақырудамыз. Осы орайда, келер жылға жергілікті азаматтардың қолдауымен 35 жобаны іске асыруды ойлап отырмыз. Олардың қатарында демалыс саябақтары, спроттық алаңдар мен гүлзарлар, тынығу саябағы мен жастар орталықтарын орнату жұмыстары бар, - деген Асхат Берлешұлы бұл бастамалардың жастарды отансүйгіштікке баулып, бұқараның спортпен тұрақты шұғылдануына ықпал ететіндігін жеткізді.

Нұржан Дүзбатыр

Зеленов ауданы

Опубликовано: 28 қараша 2017, 11:29

КӘРІМ ӨТЕҒҰЛОВ ӨЗ АУЫЛЫНДА ТАРИХИ-ӨЛКЕТАНУ МУЗЕЙІН АШТЫ

Ақпәтерлік Кәрім Өтеғұлов өз ауылында тарихи-өлкетану музейін ашу үшін 7,5 млн теңге қаржысын жұмсаған. Ақсақал өмірінің ең қызықты, қуатты кезін бұрынғы «Красный партизан» кеңшары, қазіргі Ақпәтер ауылының дамуына арнаған екен.

Батыс Қазақстан облы­сын­дағы бұрынғы бөкейлік – Еділ мен Жайық арасындағы жалпақ даланың тарихы шежіреге тұнып тұр. Қазіргі Қазталов ауданы Жалпақтал өңірінің өткені туралы әңгіме басталса, Кәрім ағайды тоқтату қиын. Әр жылдары Ақпәтер-Біртартар-Порт Артур-Красный партизан атанған ауылының арғы-бергі шежіресін шертуден жалықпайды. Мамандығы – физика пәнінің мұғалімі, өзі Кеңес жылдарында партком, кеңшар директоры қызметін атқарған адамның елден көне бұйым жинап, ескі-құсқы «теріп кеткені» қызық көрінеді. «Оның еш қызығы жоқ» дейді бір ойым. Өзі топырағын басып, ауасын жұтып жүрген жердің тарихына қызықпау, оны құрметтемеу – мәңгүрттің ісі. Отан от басынан басталады. Кең-байтақ Қазақстанды сүю – кішкентай ауылыңды қадірлеуден қалыптаспақ. – Осы ауылға, ол кезде «Красный партизан» ет совхозы, 1985 жылы тамыз айында директор болып келдім, – дейді Кәрім Тәжмағамбетұлы. – Ауыл­дың аты – Порт Артур еді. «Неге бұлай? Бұл жердің өз та­ри­хы қайда?» деп сұрас­ты­рып жүріп, ауылдың байыр­ғы атауы Біртартар екенін анық­тадым, – дейді кейіпкеріміз. Бұл ауыл іргедегі Саратов облысының Александров Гай қаласына көлікпен бір күндік жерде орналасқан. Ертеде Атырау мен Жаңақазаннан кіре тартқан көліктер осы жер­ге келгенде «Делбені бір тар­татын жерге келдік қой, осы жерге түнеп, ат шалдырып алалық» дейді екен. Бұл жер­де бір татар, бір қазақ үйі жолаушыларға қызмет көр­сетіп тұрыпты. Сыртын әкпен сы­лаған керуен сарай алыс­тан аппақ болып көрінеді екен. Содан Ақпәтер атанған. Кейін 1930-жылдары әуеден фо­тоға түсіріп, өңірдің картасын жасап жүрген ұшқыштар ауыл шетіне қонып, «Бұл қай ауыл?» деп сұрамай ма? Сон­да «Біртартар» деген сөзге түсін­бей, «Порт Артур» деп жаза салыпты... Айтпақшы, Кәрім аға ауыл атауы айналасындағы осы тарихты 1988 жылы «Мәдениет және тұрмыс» журналына жазып, мәселе көтерген. Сөйтіп тұрғындардың талабымен, ауыл­дық және аудандық мәжі­ліс хаттамалары толтырылып, облысқа, одан әрі республикаға жіберіліп, ақыры 1992 жылы ауыл Ақпәтер атанды. – Бала, сен білесің бе, біз­дің ауылға 1922 жылы отар­ба келген. Патша өкіметі кезін­де мына Қараөзенмен бу қа­зан­дығы бар пароход жүрген, – дейді Кәрім аға тағы бір тарихтың шетін қылтитып. Сөйтсек 1921 жылы Аза­мат соғысының қызған кезінде Ембі мұнай кәсіпшілігі мен Алғай (Александров Гайды қазақтар әлі күнге Алғай деп атайды) арасында 500 верс­тік шойынжол салу туралы Лениннің тапсырмасы болғаны рас екен. Чапаев дивизиясының 40 мың армиясы осы іске жұ­мылғанда, «Алгемба» атал­ған құрылысты Фрунзе бас­қа­рыпты. Аштық пен аурудан бір жыл ішінде 35 мың адам қы­рылды дейді деректер. Ақы­ры большевиктердің бұл ісі­нен түк шықпаған. Алғайдан шық­қан сынақ пойыз қазіргі Ақ­пәтердің жанындағы Бай­тұрған қыстағына дейін келіп, кері қайтыпты... Кәрім Өтеғұлов 1998 жыл­ға дейін кеңшар директоры болды. 2003 жылға дейін өндірістік кооперативті бас­қарды. Колхоз-совхоз ыдырап, балапан басымен, тұрымтай тұсымен кеткен кезде шаруаға ыңғайлы малшы қыстақтарын іске мығым, еңбекқор ауылдас­тарына беріп, ақыл-кеңесін аямаған. Соның арқасында бүгінде кішкене ауылдан 20 шаруа қожалығы шығып, мыңғыртып мал өсіріп отыр. – Совхоз кезінде ауылда жекені қосқанда 500 бас жылқы, 5 мың ірі қара болатын. Қазір 1700 жылқы, 700-дей сиыр бар. Бұрын қой 23 мың еді, кешегі аласапыранда жойы­ла жаздаған қой қазір 18 мың­ға жетті. Ауылда 51 жа­ңа трак­тор бар, – деп жатқа соға­­ды ақ­сақал. Жасы 80-ге келсе де Ақ­пә­тердің жоғын түген­­деуін қой­маған. Ауылға қатыс­ты кез келген деректі шырт ұйқы­дан оятып алып сұра­саңыз да жаңылмай айтатын шығар. – Алақандай ауылда 3200 құнды жәдігері бар музейді қалай аштыңыз? – деймін қызығып. – Музей туралы 2000-жылдардан бері ойлап жүретінмін. Әркімге айтқанмен, серік болып ешкім шықпады. Содан өзім кірістім. 2011 жылы жер алып, арнайы музей үшін өз кү­шіммен ғимарат салдырдым. Ел-жұртқа сауын айтып, жәдігер жинадым. Пәлен жерде көне жәдігер, құнды бұйым бар десе, ерінбей барып, саудаласып сатып алдым. Оралдан, Ордадан музей мамандарын алдырып, музей жасақтадым. Осының бәріне 7,5 млн теңге қаржым, екі жыл уақытым кетіпті. Сөйтіп 2013 жылы Оралға келіп, облыс әкіміне хат жаздым. «Осылай да осылай, өз қаржыма осындай музей жасақтадым. Бұл өзім үшін емес, ел үшін. Осы музейді мемлекет қарауына алуыңызды сұраймын» дедім. Обалы не керек, әкімдер сөзге келмеді. Батыс Қазақстан облыстық тарихи-өлкетану музейінің балансына алды. Қазір Ақпәтер тарихи-өлкетану музейінде 13 адам қызмет етеді, жылына мыңнан аса адам арнайы келіп, ауыл тарихымен танысып кететін мәдениет ошағына айналды, – дейді ағамыз мақтанышпен. Ақпәтерде қазір 1200-ден аса адам тұрады. Орта мектепте 220 оқушы бар және ол жыл сайын өсіп келеді. Ауылда өнер мектебі, спорт мектебі жұмыс істейді. Табиғи газды 1991 жыл­дан бері тұтынатын ақпә­тер­ліктер бүгінде қала тұр­мы­сына көшкен: үй ішін­дегі дәретхана мен ванна ауыл­дық­тарға таңсық емес. «Осының бәрі тәуелсіздіктің арқасы ғой!» дейді Кәрім ағамыз. «Өз ұлын, өз ерлерін ес­кер­месе, Ел тегі қайдан алсын кемеңгерді!» демекші, ауыл­дас­тарының Кәрім ақса­қалға құрметі де бөлек. Биыл Тәуелсіздік күнімен қатар ке­летін 80 жасын аудан көле­мінде атап өткелі жатыр. – Сол дүбірдің қажеті де жоқ еді, – дейді Кәрім ақса­қал қарапайымдылықпен. Кей­бі­реулерге ұқсап қартайғанда қалаға жылыстап кету де ойында жоқ. «Шіркін, әр ауылда осындай ақсақал болса, ел іргесі сөгілмей, берекесі кетпес еді-ау!» деймін ішімнен.    

Қазбек ҚҰТТЫМҰРАТҰЛЫ,

«Егемен Қазақстан» Батыс Қазақстан облысы

Опубликовано: 25 қазан 2017, 18:27

БҚО-да жыл соңына дейін "Рухани жаңғыру" музейі ашылады

Бұл туралы Астана қаласында өтіп жатқан брифингте Батыс Қазақстан облысының әкімі Алтай Көлгінов мәлімдеді.

Облыста Қасиетті орындар тізіміне алдымен ортағасырлық «Жайық» қалашығы мен «Бөкей Ордасы» тарихи-музей кешені кірсе, қазір олардың саны алтауға дейін жетті. Яғни, қосымша Тақсай қорған кешені, (б.з.д VI-V ғ.) Жұмағазы хазірет (ХІХ ғ), Ғұмар Қараш зираты және Жымпитыдағы Алашорда музейі.

- Өңірімізде жыл соңына дейін «Рухани жаңғыру» атты музей ашу жоспарлануда. Музейде «Рухани жаңғыру» бағдарламалық мақалада көрсетілген міндеттер қамтылатын болады. Өңірімізден Қасиетті Қазақстан тізіміне енген тарихи орындардың көшірмелері, латын тілінде шыққан баспасөз, Алаш мұралары және тәуелсіз Қазақстанның бүгінгі жетістіктері қамтылмақ.

Сонымен қатар аталған бағдарлама бойынша 20 жоба және 113 кіші жоба жүзеге асырылуда. Жобалық офисте бекітілген жоспарлар 2018-2022 жылдар аралығында жүзеге асыру көзделуде. Елбасының мақаласында көрсетілген 6 бағытқа толықтай сәйкес келеді, - деді А.Көлгінов.

zhaikpress.kz

Сауалнама

Бос уақытыңызда Сіз дене шынықтыру және спортпен айналысасыз ба?
Мекен-жай
Қазақстан Республикасы, Батыс Қазақстан облысы, Орал қаласы, Достық-Дружбы, даңғылы, 179
Сайтты қолдау
IT Group Kazakhstan