07 Қараша 2018
406

БҚО делегациясы шекаралық серіктестік аясында Самара облысында болды

07.11.2018ж

 

Батыс Қазақстан облысы Ресей Федерациясының Самара облысымен өзара тиімді ынтымақтастықты дамытып келеді.
Қазақстан мен Ресей шекаралық серіктестігінің XV Форумы аясында БҚО делегациясы жұмыс сапарымен Самара облысына барып, облыс губернаторы Дмитрий Азаровпен кездесті.

 

- Екі жақты әріптестік қарым-қатынас екі елдің басшыларының тұрақты әрі жемісті байланыстары туралы айтуға мүмкіндік беретін жоғары деңгейдегі кездесулерінің мазмұндылығымен және серпінділігімен ерекшеленеді.

 

Елбасы Нұрсұлтан Назарбаев үнемі Ресейді біздің басты стратегиялық әріптесіміз, жақсы көрші ретінде ғасырлар бойы қалыптасқан достығымыз байланыстырып келетінін айтып келеді, - деп атап өтті Алтай Көлгінов.

 

Облыс әкімінің айтуынша, былтырғы жылы БҚО мен Ресей Федерациясы арасындағы тауар айналымы 600 млн. АҚШ долларынан асқан. 2018 жылдың 8 айында сыртқы сауда айналымы 420 млн. АҚШ долларын құрап, көрсеткіш 15,8%-ға артты.
Кездесуде БҚО әкімі өңірдің экономикалық, инвестициялық және туристік әлеуетін дамыту туралы әңгімеледі. БҚО-да шетелдік 86 фирма белсенді жұмыс жасауда, халықаралық инвесторлармен бірлескен 238 кәсіпорын бар, олардың көпшілігі Ресей Федерациясынан.

 

-Мемлекет басшысы көлік-логистикалық инфрақұрылымның дамуына аса мән беруде. Облыстағы іскерлік белсенділікті арттыру мақсатында әуежай қайта қалпына келтірілмек. Әртүрлі қала мен елдерге, соның ішінде Мәскеу мен Франкфуртқа да ұшатын тікелей рейстер бар. Орал-Саратов тасжолының құрылысы аяқтала келді. Шекарада 8 жолақты жол салынады. Оралдан Ресей Федерациясының оңтүстік аймағына дейін апаратын жолдың құрылысы жүріп жатыр. 2019 жылы Самара облысының шекарасына дейін сегіз жолақты жол салу жоспарда бар. Келесі жылы Орынбор облысының шекарасына дейінгі жолды жөндеу жұмыстары басталады, - деді Алтай Көлгінов.

 

БҚО әкімі туризм саласында екі аймақ арасындағы ынтымақтастықты нығайту туралы ұсыныс айтты. Облыс әкімі қос өңір арасында әуе қатынасын ұйымдастыру, балалар мен жасөспірімдер туризмін дамытуды ұсынды.

 

Айта кетейік, аймақтағы балалар мен жасөспірімдер туризмі ТМД елдерінің ішінде үздік үштікке кіреді, ал балалар туризмі орталығы ЮНЕСКО клубының мәртебесіне ие.


Самара облысының губернаторы Дмитрий Азаров өз кезегінде екі ел президенттері екіжақты ынтымақтастық үшін сапалы жаңа міндеттер қойғанын атап өтті. Сондай-ақ жыл сайын жұмыс барысында айтарлықтай қадам жасап, қарым-қатынастың көкжиегін кеңейтіп, жұмыс қарқынын арттыру қажеттігін тілге тиек етті. Бүгінде ынтымақтастықты нығайту бағытында қарастырылған көптеген сала бар, олардың бірнешеуі сәтті жүзеге асты.

 

Айта кетейік, екі аймақтың кәсіпорындары арасында өзара тиімді ынтымақтастық бар. Мысалы, «Зениттехсервис» ЖШС кластерлік машина жасау орталығы ұшқышсыз ұшу құрылғысын әзірлейтін «Самара» инженерлік зертханасымен өзара жұмыс жасауда.
БҚО компаниялары азық-түлік және жеңіл өнеркәсіп саласында, сондай-ақ басқа да салалар бойынша әріптестік қарым-қатынас жүргізіп келеді.

 

Жұмыс сапары кезінде бизнесті дамыту жөнінде кездесу өтті. Іскерлік кездесуде экономиканың барлық салаларында, оның ішінде ауыл шаруашылығы, өнеркәсіп, индустрияда екі жақты ынтымақтастықты одан әрі дамыту бойынша келіссөз жүргізілді.


Кездесу нәтижесінде сауда-экономикалық, ғылыми-техникалық, әлеуметтік, мәдени-гуманитарлық салалардағы ынтымақтастық туралы келісімге қол қойылды. Маңызды құжатқа қол қойған соң, БҚО делегациясы облыстың бірқатар маңызды әлеуметтік-экономикалық нысандарын аралап, «ИДК Ана мен бала» жоғары технологиялық медициналық орталығы және «Агропарк» агрокешенінің жұмысымен танысты.

 

Облыстың ірі кәсіпорындары өз өнімдерін «Агропаркке» жеткізіп, ауыл шаруашылығы, өнеркәсіп, денсаулық сақтау және туризм саласында ынтымақтастықты дамытып, тәжірибе алмасуға сөз берді.

 

zhaikpress.kz